 |
Հայաստանի Ազգային գրադարանը Հայաստանի Հանրապետության գլխավոր գրադարանն է`
գիտակրթական, մշակութային, տեղեկատվական խոշոր հաստատություն, որը հավաքում,
պահպանում և սպասարկում է տպագիր արտադրանքի տարբեր տեսակներ (գիրք, ամսագիր, թերթ,
քարտեզ, պլակատ, ատենախոսություն, նոտա, ձայնապնակ, դրամ, բացիկ և այլն) և
էլեկտրոնային կրիչների հայերեն և օտարալեզու հավաքածուներ: Ազգային գրադարանը
գրադարանագիտական, մատենագիտական, մեթոդական, միջգրադարանային բաժնույթի,
տեղեկատվության և գրքափոխանակության համապետական կենտրոն է: |
|
Մեծահարուստ այս գանձարանում են պահպանվում հայերեն առաջին տպագիր գրքերը
(1512-1513թթ. Վենետիկ), առաջին քարտեզը (1695թ. Ամստերդամ), առաջին պարբերականը
(1794թ. Մադրաս) և այլ եզակի ու մեծարժեք հրատարակություններ: |
 |
Ազգային գրադարանի ֆոնդերը ձևավորվել են պետական, հասարակական, գիտական և
մշակութային նշանավոր գործիչների անձնական գրադարանների, կրթական և ուսումնական
հաստատությունների հավաքածուների և նվիրատվությունների հիման վրա: 1924թ.-ից
գրադարանը ստանում է Հայաստանում լույս ընծայվող տպագիր արտադրանքի պարտադիր անվճար
օրինակներ: 1925-1991թթ. գրադարանը ստացել է ԽՍՀՄ-ում լույս տեսնող գրականության
պարտադիր օրինակներ: |
|
2007թ. հունվարի 1-ի դրությամբ գրադարանի ֆոնդը կազմում է ավելի քան 6,6 միլիոն
հաշվառային միավոր և համարվում է աշխարհի ամենախոշոր հայերեն գրականության պահոցը:
Գրադարանի հավաքածուներում կան բացառիկ արժեք ներկայացնող հրատարակություններ,
որոնք հայ ժողովրդի հոգևոր հարստությունն են: |
 |
Հայաստանի Ազգային գրադարանի պատմության սկիզբը համարվում է 1832 թվականը, երբ
հիմնադրվում է Երևանի Արական գիմնազիայի գրադարանը: 1919թ. հուլիսի 4-ին ընդունված
Պետական հանրային մատենադարանի մասին օրենքով գրադարանը ստանում է պետական գլխավոր
գրադարանի կարգավիճակ: 1982 թվականին, հիմնադրման 150-ամյակի կապակցությամբ,
գրադարանը պարգևատրվել է ՙԺողովուրդների բարեկամության՚ շքանշանով: |
|
Իր պատմության ընթացքում գրադարանն ունեցել է մի քանի անվանում` Հանրային գրադարան,
Հայաստանի պետական հանրային գրադարան, Հայաստանի հանրապետական գրադարան, ՀԽՍՀ
պետական գրադարան: 1990 թվականից այն կոչվում է Հայաստանի Ազգային գրադարան: |
 |
1925-1990թթ. գրադարանը կրել է հայ նշանավոր գործիչ Ալեքսանդր Մյասնիկյանի անունը,
ով մեծ ներդրում է ունեցել գրադարանի կայացման գործում: 2007թ.-ին լրանում է նաև
գրադարանի գրահրա-տարակչական գործունեության 70 տարին: Այս ընթացքում գրադարանը
հրատարակել է ավելի քան 1000 անուն գրադարանագիտական, մատենագիտական, մեթոդական,
տեղեկատվական գրքեր և բրոշյուրներ: Գրադարանը տեղավորված է 4 մասնաշենքում, որոնք
շահագործման են հանձնվել համապատասխանաբար 1939 (Ալ.Թամանյանի նախագծով), 1972,
1976, 1990 թվականներին (վերջինս լիովին շահագործման հանձնված չէ): |
|
Գրադարանի հարուստ ֆոնդերից օգտվում են Հայաստանի Հանրապետության 17 տարին լրացած
քաղաքացիները` անկախ սեռից և ազգային պատկանելությունից, ինչպես նաև արտերկրից
ժամանած հյուրերը և զբոսաշրջիկները: Տարեկան սպասարկվում է շուրջ 1,7 միլիոն
հաշվառային միավոր` 14 մասնագիտացված ընթերցասրահներում: Օրական գրադարան է
հաճախում 900-1000 օգտվող: |
 |
Գրադարանում իրականացվում է ՀՀ խոշոր գրադարանների միասնական տեղեկատվական
ավտոմատացված ցանցի ստեղծման ծրագիրը: EIFL Direct ծրագրով գրադարանի ընթերցողները
կարող են օգտվել ավելի քան 3 հազար գիտական հանդեսներից, ինչպես նաև տեղեկատվական
մյուս բազաներից:
|
|
|
|